حكايات من كل لون ! على و خالد و ايمن وسامح و ياسمين ونور و ندى .......

السلام عليكم و رحمه الله و بركاته
اعضاء الاهلاوية الكرام
مفتقداكوا كتيييييييييييير جدا
بصوا بقى
الموضوع دة انا قريته فى عالم المجهول و المعلوم و المعرفو بالفيس بووك
و عجبنى جدا
هو عبارة عن موضوع و اراء الناس عليه
ملقتش ليه مكان غير هنا
اصله ميفنعش فى الفضفضة
لان فى حكايات
فقلت انزله هنا
و مطلوب تقرأو و تقولوا رايكوا و بصراحة شديدة♥♥`*• ♥♥`*• ♥♥`*• ♥♥`*• ♥♥`*• ♥♥`*• ♥♥`*• ♥♥`*•






فاكرين فيلم "أنا مش معاهم" اللي بيحكي عن قصة شاب مستهتر عايش حياته في المخدرات والسهرات المشبوهة ولما بيقابل بنت محجبة وبتعجبه وعلشان يقرب منها بيمثل إنه ملتزم ويعرف ربنا وفعلا بتحبه قبل ما تكتشف حقيقته.

يمكن الفيلم كان يقصد حاجة أو يشير لحاجة لكن اللي يهمنا هنا هو السؤال هل التدين سبب أساسي دلوقتي للارتباط بين أي اتنين ولاّ هو عامل مش مهم قوي موجود أو مش موجود ولاّ عامل طرد ولا إيه... تعالوا نشوف.

♥♥`*• ♥♥`*• ♥♥`*• ♥♥`*• ♥♥`*• ♥♥`*• ♥♥`*• ♥♥`*•

إنك لا تهدي الأحبة






خالد: بالنسبة لي أنا الحمد لله باصلي ويعني باحاول أقرب أكتر من ربنا لكن قبل ما أتجوز مراتي ما كانتش محجبة وده ما أثرش عليّ بالعكس أنا كنت عايزها كده وأنا اللي أخليها تلتزم، المهم إنها كانت مؤدبة وهادية وارتحت لها لكن حكاية التدين دي كنت عايز أنا اللي أزرعها فيها وفعلا ده حصل وقدرت أؤثر فيها..!!

وموقف خالد ممكن ناس كتير تستغربه وتقول إنه كده بيخدع نفسه لأنها لو كانت اتجهت للتدين علشانه فده مش هيكون تدين حقيقي ويقدر يطمئن ليه ولو كان حقيقي يبقى ممكن يكون هو عامل مساعد بس، لكن مش هو الأصل لأن ربنا هو اللي بيهدي مش البشر، وده فعلا صحيح من ناحية لكن برضه ده ما يمنعش إن طرف يؤثر في التاني ويخليه يقرب أكتر من ربنا بس المهم يكون القرب ده حقيقي مش مجرد تمثيل لحد ما الجوازة تتم وتظهر الأمور على حقيقتها.

♥♥`*• ♥♥`*• ♥♥`*• ♥♥`*• ♥♥`*• ♥♥`*• ♥♥`*• ♥♥`*•

ديني ولا زواجي






ياسمين: أنا حكايتي حكاية، غلبت مع ماما باقول لها يا ماما الجواز ده نصيب ومش معنى إني لابسة النقاب يبقى كده مش هاتجوز.. ما ياما ناس ما بتخرجش من بيتها أصلا وبيتجوزوا وهي برضه مُصرة على إني أغير طريقة لبسي لأن ما حدش هيتجوزني وأنا كده ومش قادرة تقتنع إني أصلا مش عايزة واحد يتجوزني علشان شكلي، نفسي في حد يتجوزني علشان أنا متدينة علشان أضمن إنه فعلا أخلاق بس هي مش مقتنعة ومش عارفة أعمل إيه..؟






أيمن: أنا عارف إن دقني ومحاولات التزامي اللي باحاول إنها تكون حقيقية ممكن تخوّف بنات كتير مني ولو هم اقتنعوا فأُسرهم بتكون خايفة من ارتباطهم بيّ وخايفين إني أكون متزمت أو إني أدخل السجن لكن مش معنى التزامي إني يكون ليّ نشاط سياسي، أنا باحاول أعمل اللي عليّ وباعامل الناس كويس لكن لما أعترض على حاجة بيعملوها وشايفها غلط على طول يقولوا لي: "عم الشيخ" و"معقد" وحاجات كده، بس باحاول ما أديش الكلام ده أهمية لأني مقتنع باللي باعمله أما عن الزواج فأنا عارف إنها مسألة نصيب في الأول وفي الآخر وإن شاء الله في يوم هالاقي اللي تفهمني واللي إن شاء الله هاكون حريص إنها تكون متدينة وعاقلة.

وبالنسبة لياسمين فهي حالة قديمة وموقف مش جديد من أمهات كتير بيطلبوا من بناتهم إنهم "ما يقفلوهاش قوي" و"ما يستشيخوش فيها" ويبرروا لبنتهم ده بإنه علشان الخُطّاب ما يهربوش منها وتلاقي اللي يتجوزها وتعمل اللي عايزاه بعد الجواز، تلبس حجاب ولا نقاب ولا أي حاجة مش مهم ما هي اتجوزت وخلاص....!!

نفس الموقف بالنسبة لأيمن لأن فيه فكرة سائدة وليها مشجعين كتير وهي إن البنات بتحب الشاب "المطأطأ" أبو دم خفيف ولو فرض واحترمت الشاب العاقل إلا إنها عند الارتباط تفضل اللي عنده علاقات وبيتنطط كتير بمعنى تاني هو ده اللي عليه العين..!!

لكن البداية الغلط لازم تؤدي لنتيجة غلط والارتباط والزواج مسئولية في الأول وفي الآخر لازم تكون ليها قاعدة قوية علشان يوصل الطرفين لبر الأمان وعمر التحرر والانطلاق وعدم احترام التقاليد المتعارف عليها ما هيشكلوا قاعدة أساسية لعلاقة ناجحة ومستقرة بين أي اتنين.

♥♥`*• ♥♥`*• ♥♥`*• ♥♥`*• ♥♥`*• ♥♥`*• ♥♥`*• ♥♥`*•

لحد إمتى...؟






سامح: أنا بقى موضوع الارتباط ده مش في دماغي أصلا ولو إني عارف إن البنات دلوقتي بتحب الشاب الروش الكول مش اللي بيقول قال الله وقال الرسول ويقفل عليها، لأ بتكون عايزة كلام حب، واحد يحسسها إنها ملكة ولو حتى بالكدب علشان كده أنا مش رابط ده بده، وحتى لو لقيت واحدة باين عليها عاقلة شوية برضه ما باحاولش أعمل متدين والكلام ده وباتعامل بطبيعتي وغالبا بانجح وبعرف أكلمها وده بيكون انتصار في التحدي بيني وبين نفسي على الأقل لكن الارتباط الجد مش في دماغي خالص لا دلوقتي ولا بعدين وأديني مقضيها.

دلوقتي ولا بعدين وأديني مقضيها.





سهى: الشكل أهم حاجة عند الشباب دلوقتي ولازم البنت تكون على الموضة واستايل علشان تعرف تلاقي اللي يحبها ويرتبط بيها أما حكاية التدين دي فمتهيألي مش مهم قوي خصوصا إن معظمنا مش محدد مفهوم واضح للتدين وساعات ناس بتكون شكلها من بره متدين جدا ولكن الله أعلم باللي جواها فمفيش واحد أول لما بييجي يرتبط بيسأل عن التزامها في العبادات والطاعات وحتى لو لقاها مش متدينة قوي بس عاجباه برضه بيكمل وما بيهمهوش قوي الحكاية دي.

واللي بيقوله سامح وسهى صحيح فعلا وبيحصل إن فعلا فيه ناس ما بيهتموش غير بالمظاهر وبس والتدين ده ما بيكونش في بالهم ده إن ما كانش مصدر تخويف ليهم من الارتباط بالشخص ده لكن زي ما قلنا في حالة أيمن وياسمين، البداية الصح لازم تؤدي لصح أما البداية الغلط فمش هيكون ليها نتيجة غير الغلط وكل واحد على حسب اختياره هيلاقي النتيجة

♥♥`*• ♥♥`*• ♥♥`*• ♥♥`*• ♥♥`*• ♥♥`*• ♥♥`*• ♥♥`*•

تدين عن جد ولا هتعود ريما لعادتها القديمة






هدى: أنا لبست الحجاب شوية أيام وكنت باروح الجوامع وأسمع دروس يمكن واحدة عندها ابن أو أخ تشوفني وأعجبها وفعلا حصل وحصلت خطوبة لكن ما استمرتش كتير وفسختها لأسباب كتير فرجعت تاني للي كنت فيه وقررت ما أعملش غير اللي مقتنعة بيه..!!

وموقف هدى برضه بقى كتير قوي؛ ففيه ناس بتتجه دلوقتي للتدين سواء المظهري أو الجد على أمل إنها تلاقي شريك حياة، وفيه ناس الموضوع بيقلب جد معاهم وبيقربوا بجد سواء بهدف الزواج أو بهدف القرب من ربنا ومحاولة الرضا بقضائه وقدره ولكن فيه ناس تانية الموضوع عندها بيكون مظهر وبس قدام الناس ودول طبعا سريعا جدا ما "بيزهقوا" من التظاهر وترجع ريما لعادتها القديمة.

♥♥`*• ♥♥`*• ♥♥`*• ♥♥`*• ♥♥`*• ♥♥`*• ♥♥`*• ♥♥`*•

روشنة = تدين






ياسر: أنا اتعقدت بصراحة من فكرة الارتباط دي خالص سواء من بنت روشة وعايشة حياتها أو بنت باين إنها متدينة، أنا جربت الارتباط بالنوعين، الأولى باحس إنها تافهة ومش ممكن تتحمل مسئولية أسرة وارتباط ومحتاجة فرمتة من أول وجديد، والتانية كل حاجة تقول لي حرام، أكلمها حرام أقرب منها حرام كل حاجة تقول لي إنت مش جوزي أقول نكتب الكتاب أهلها ما يوافقوش لأحسن تحصل مشاكل وتبقى البنت مطلقة. يا سلام! يعني أنا أفضل خاطب واحدة سنتين وتلاتة لحد لما أكون نفسي وما أقدرش حتى أمسك إيديها دي ما تبقاش عيشة، أنا مش وحش وباصلي.. صحيح أحيانا بانسى الوقت بس باصلي يعني أحسن من غيري برضه بس عايز أعيش حياتي برضه مع واحدة أرتاح لها وده متهيألي مش عيب.

مروة: أنا قلت مش هارتبط غير بواحد متدين وفعلا ده حصل كانت ظروفه المادية مش حلوة وقلت هاستحمل لقيته مش عاجبه أي حاجة باعملها وعايز يقفل عليّ زي ما أكون محبوسة لا زيارات ولا خروجات ولو حتى مع والدتي أو مع العيلة وكمان تحكمه في طريقة لبسي رغم إني مشهود لي بالاحترام ولبسي فعلا واسع ومش ملفت لكن لقيت التحكم فيه داء ومفهومي عن التدين مختلف عن مفهومه فما قدرتش أستحمل وسِبنا بعض.




وفكرة ياسر عن الارتباط واختيار شريكة حياته واضح إنها مش متظبطة يعني مش عارف هو عايز إيه بالضبط وعلى أي أساس يختار وإيه اللي ممكن يتنازل عنه في مواصفات شريكة حياته وإيه اللي ما يتنازلش عنه أبدا؛ فالتدين عنده حاجة والحياة حاجة تانية ما ينفعش إنهم يتقابلوا وده طبعا اتجاه مش صح وبيتعب قوي اللي ماشي عليه؛ فلازم الواحد يحدد هو عايز إيه على الأقل بصفة تقريبية ويكون عنده أساس يلتزم بيه في اختيار نصفه التاني.

وتشبه له شوية فكرة مروة فهي حطت خطوط عريضة قوي للتدين رغم إنه فعلا بحر واسع والرسول عليه الصلاة والسلام نصح باختيار شريك الحياة بناء مش بس على تدينه لأ كمان على أساس أخلاقه وإننا نرضى بيها فلازم يكون فيه خطوط واضحة نقدر نحكم بيها على الإنسان اللي هنرتبط بيه علشان نقدر نحل أي مشكلة تواجهنا في الحياة عموما.

♥♥`*• ♥♥`*• ♥♥`*• ♥♥`*• ♥♥`*• ♥♥`*• ♥♥`*• ♥♥`*•

القلب وأحكامه






نادر: أنا بقى كنت مُصر على إن شريكة حياتي لازم تكون متدينة جدا ومش بس بتؤدي الفروض لأ تكون كمان ملتزمة بالسنن واللبس المحتشم علشان تاخد بإيدي وتشجعني على الصح لو أنا في يوم عملت حاجة غلط أو زي ما بيقولوا الهمة فترت، وفضلت مش لاقي اللي أنا عايزه لحد لما قابلت واحدة ومش عارف إزاي في يوم وليلة حبيتها رغم إني عرفتها من على النت وكانت في الأول عاملة نفسها ولد وبعدين لما شفتها حصلت بينّا حاجات مش صح بس برضه لسه بحبها ومحتار بين عقلي اللي بيقول لي إنها مش مواصفات شريكة حياتي وبين قلبي اللي خلاص ما بقاش يستغنى عنها.







إسراء: طول عمري قافلة على قلبي وما باسمحش بأي علاقة من النوع المنتشر بين البنات والشباب تحت مسمى الارتباط وخدت عهد على نفسي إني مش هاحب غير اللي هاتجوزه وكنت باصد أي اهتمام بقوة وباخلي نفسي دايما بره أي ارتباطات علشان أحافظ على نفسي لحد لما قابلته شدني ذوقه وأخلاقه وحب الناس ليه وخدماته لكل اللي حواليه وكمان اهتمامه بيّ وما كنتش متخيلة إن فيه واحد في مركزه سواء الاجتماعي أو المادي ممكن ياخد باله مني رغم إني بشهادة الجميع جميلة ومحترمة وفعلا اتعلقت بيه لكن برضه من غير ما أبين أي حاجة خصوصا إن التعامل بينّا أصلا ما كانش كتير لكن فوجئت وعرفت بالصدفة البحتة إنه مش مهتم بالعبادات مش عارفة ليه وإزاي واحد يكون ناجح كده ويبعد عن ربنا وإزاي يكون بالأخلاق دي وما بيصليش وعادي، بصراحة اتصدمت وللأسف مش قادرة أنساه وبرضه مش هينفع أكون ليه في يوم من الأيام لأني مش ممكن أسلم نفسي وأحس بالأمان ناحية إنسان ما بيسجدش لربنا ومش مهتم برضاه، أمّال هيعمل في إيه، علشان كده كان لازم أنساه وما أفكرش فيه أبدا ويارب ألاقي اللي يعوضني عنه خير.

وموقف نادر وكمان إسراء بيحصل لناس كتير بتكون حاطة قاعدة أساسية ومواصفات بالعقل مش ممكن تستغنى عنها لكن ولأن القلب ليه أحكامه ممكن جدا إنه يحصل ويتعلق بإنسان يرفضه العقل لأنه بعيد عن مواصفاته وساعتها فمن الأفضل لكل الأطراف إنه يحاول يسيطر على قلبه وما يمشيش وراه أو يخليه هو المتحكم الرئيسي في حياته لأن في الارتباط والزواج صحيح القلب مهم ولازم تكون فيه مشاعر لكن برضه العقل هو اللي بيمشي المركب كمان القلب متقلب ومش ممكن الاعتماد عليه لوحده في اتخاذ خطوة مهمة قوي زي دي.


♥♥`*• ♥♥`*• ♥♥`*• ♥♥`*• ♥♥`*• ♥♥`*• ♥♥`*• ♥♥`*•

غلطت في إيه...؟ ولا حاجة






علي: أنا بقى خليت والدتي هي اللي تختار واحدة نكون عارفين أصلها وفعلا جابت لي صورة واحدة عجبتني ولما سألنا عنها في الشارع لقينا سيرتها مفيش أحسن من كده ولما اتكلمت معاها لقيتها عاقلة وحتى ما كانتش عايزة تسلم عليّ بإيديها وقالت إنها عارفة ربنا كويس وبتخاف منه جدا قلت أنا لقيت عروسة لقطة وربنا عوّض صبري خير وعلشان أنا جاهز من كله قلت الخطوبة مش هتستمر أكتر من شهرين تلاتة وبعد ما حضرنا كل حاجة في يوم باتصل بيها من الشارع لأن موبايلي كان فاصل شحن وخفت تقلق عليّ ومش عارف إزاي ما عرفتش صوتي في الأول فحبيت أكمل اللعبة وأهزر معاها شوية لقيتها بتكلمني على إني واحد تاني كانت على علاقة بيه والموضوع وقف شوية وساعتها ما بقتش عارف أرد بإيه فقفلت معاها وأنا مش شايف قدامي ولما حبيت أعرف العلاقة بينهم وصلت لحد فين كلمتها تاني على إني الشخص ده وعرفت اللي ما كنتش في يوم ممكن أتصوره لأ والأكتر إنها عايزة تعيد اللي كان ولا كأن لي مكان في حياتها ونفسي أعرف أنا غلطت في إيه...؟






نور: أنا بقى كل حاجة اتلخبطت في دماغي كنت فاكرة إن كفاية يكون اللي هارتبط بيه بيصلي وبيصوم علشان يبقى كويس وارتبطت بواحد ما كانش بيفوّت فرض ما كنتش فاكرة إن دي مكن تكون مظاهر وبس قدام الناس، وشكيت فيه بسبب بعض تصرفاته بس هو كان بيقول بسبب حبه لي مش عايز يبعد عني لكن لقيت كمان كدب وتسويف كل شوية في الميعاد اللي هيتقدم لأسرتي فيه لحد ما عرفت إنه ليه كمان علاقات تانية وساعتها كل حاجة بقت سوداء في عيني ومش عارفة على أي أساس هاختار بعد كده








ندى: أنا اتربيت من صغري على إن البنت المحترمة المتدينة هي اللي بتلاقي الحب الحقيقي وإن الشاب الجد ما بيخترش غير واحدة عارفة ربنا كويس ومؤدبة لكن لقيت العكس هو اللي بيحصل كل البنات اللي ما بيهمهاش غير لبسها ومكياجها والمطرب الفلاني والعلاني هم اللي واخدين كل الاهتمام ومش بس ارتباطات لأ دي خطوبة وجواز يعني مش علاقات طياري ومش عارفة الصح فين والغلط فين ومش باقول كده وخلاص لأني اتعرضت لحاجة زي كده وكان فيه حد فعلا معجب بيّ أو فيه بوادر اهتمام ظهر لكل اللي حوالينا وفضل سنة كده لكن ما قالش حاجة ولكن شوية وجاءت لنا زميلة من اللي هم نص كلامهم إنجليزي والنص التاني عربي مكسر لزوم الرقة يعني وفي أقل من شهر كان خطبها، أنا مش زعلانة عليه لكن زعلانة على نفسي ومش عارفة أعمل إيه....؟


واللي حصل لعلي ولنور وكمان ندى وغيرهم كتير ممكن جدا إنه يؤثر بالسلب على ناس كتير ويهز صورة ثوابت ناس كتير شايفة إنها مش ممكن تتزحزح وتحصل لخبطة ويتصوروا إن الخير انعدم من الدنيا لكن لو بصينا للجانب الكويس هنلاقي إنهم من البداية ما غلطوش في حاجة ومشيوا في الطريق الصح علشان كده ربنا وقف جنبهم وكشف لهم الحقيقة قبل ما يحصل جواز وأبناء ثم تظهر الحقيقة المرة، أما عن سبب وقوعهم في التجربة دي فده أكيد بيكون ليه أسباب سواء غلطات وقعوا فيها من غير ما يقصدوا أو حسن نية زيادة أو تكون فيه حكمة ما مش هيعرفوها غير بعدين لما يلاقوا الشريك الحقيقي فالمهم إنهم يتعلموا من التجارب اللي فاتت ويستفيدوا من أخطائهم ويكونوا حذرين أكتر لكن ما يتنازلوش أبدا عن اللي شايفينه صح طالما متأكدين 100% إنه صح.

♥♥`*• ♥♥`*• ♥♥`*• ♥♥`*• ♥♥`*• ♥♥`*• ♥♥`*• ♥♥`*•
♥♥`*• ♥♥`*• ♥♥`*• ♥♥`*• ♥♥`*• ♥♥`*• ♥♥`*• ♥♥`*•

الخلاصـــــــــــــــــــــــــ (: ــــــــــــــــــــــــة

عايز تعرف اللي انت بتعمله صح ولا غلط

اتخيل معايا الاتي

لو انت او انتي روحت/ي حكيت/ي سرك وحدوتك لرسول الله صلى الله عليه وسلم
ياترى هتكون فخور/ة باللي انت او انتي بتحكيه او اللي انت كنت بتعمله

حاول تقيم نفسك بالتخيل دا دايما مش بس هنا بس لأ في كل حاجة

ومن يتق الله يجعل له مخرجا * ويرزقه من حيث لا يحتسب

فيه حديث بيقول

البرّ حسن الخلق ، والإثم ما حاك في نفسك ، وكرهت أن يطلع عليه الناس

البرّ حسن الخلق ، والإثم ما حاك في نفسك ، وكرهت أن يطلع عليه الناس

البرّ حسن الخلق ، والإثم ما حاك في نفسك ، وكرهت أن يطلع عليه الناس

%%%%%%%%%%%%%%%%%%%%%%

خيركم للناس انفعكم للناس

والله من وراء القصد

مرسي يا موون على مرورك
مرسي يا جولدن عجبنى رايك جدا و مرسي على التفاعل و المشاركة فى الموضوع
كلامك سليم
ان فترة الخطوبة مهم جدا بس احيانا بتبقى خادعة جدا
احنا نعتمد على الله و نتوكل عليه
لاننا مش هنعرف الغيب
و هو هيقدر لنا الخير
مرسي مرة تانية على مرورك يا جميلة

حلو اووووووووى الموضوع ياروناتا وفعلا محتاج مناقشة
وتفاعل ميرسى ياقمر

يا نهار الواااااان
يا نهار احمر
لا اكيد انا محتاجة اعمل نضارة
لا و مش نضارة و بس
محتاجة اعمل عملية
فييييييييييييييييين الردود يا بشر
فين التفاعل يا جماعة
اين الجميع
هو حاجة من الاتنين
ياما مش عجبكوا الموضوع و الحكايات الى فيه
ياما انا مش عجباكوا فمش حابين تردو عليا
عموما
عموما
عموما
انا بردو هنزل توبيكات و هفضل وراكوا لحد ما تردو تتفاعلوا


ومرسي يا اهلاوية كوول على مرورك

هههههههههههههه
عسل ياروناتا ياحبيتى
وحشتناتوبيكاتك

وانتى كمان وحشانى
و المنتدى كله وحشنى
بس شكلكوا الاعضاء نسيوا ان التوبيكات ليها box .تحت بيتكتب فيه الردود
او مكسلين يكتبوا
مش عارف اية الى حصلهم
انا بس اخلصلكوا الامتحانات بس
و هرجعلكوا حزب المعارضة تانى
ربنا يسهل بس

ههههههههههههه
اهلا بحزب المعارضة وكلنا مستنينك ياقمر شدى حيلك
عشان نعمل توبيكات تفرق هههههههههه

مازلت منتظرة التفاعل من اعضاء المنتدى فى هذا التوبيك

موضوع جامد يسلموااااااااااااااااااا