ادخل قولنا هتعمل ايه فى الموقف ده ::متجدد::

Abeer كتب:

الموقف3

سيادتك راجع من شغلك تعبان و طالع عينك, طلعت منديل عشان العرق اللي مبهدلك خالص ... بتفكر و انت بتمسح عرقك انك عايز بسرعه تروح البيت عشان تلحق تتغدي و تناملك ساعتين عشان هتنزل باليل مع رشا و مامتها تجيبوا شويه حاجات الشقه محتاجاها

و رغم الحر و مديرك اللي معكنن عليك في الشغل انما حاسس انك مبسوط ان ميعاد جوازكم قرب كلها اقل من شهر .

و انت ماشي سرحان و بتتخيل هتقدوا شهر العسل فين لقيت اللي وقف متنح قدامك و بعلو صوت

" مصطفي ... واحشني يا ندل "

ده حسين زميلك في ثانوي و اللي مبقتش تشوفه كتير عشان اختلاف مجال الدراسه

و بعد السلامات و الذي منه طبعا لازم تبلغه الخبر السعيد

" مش انا خلاص هتجوز يا واد "
" يا راجل ... الفين مبرووووووووووك ... و ده بقي حب من ايام الجامعه ولا عرفتها من الشغل "
" لا .. الحقيقه هي جارتنا ... علي فكره دي نفس تخصصك و المفروض نفس دفعتك كمان"
" صحيح ؟؟... عموما احنا دفعتنا صغيره و كلنا عارفين بعض ... اسمها ايه ؟ "
" رشا **** .... "

عمك حسين سكت شويه ... و بعدين رجع اتاكد من الاسم ... و بان زي ما يكون مش مبسوط

" ايه يا حسين قفشت فجأه كده ليه "
" بص يا مصطفي احنا في يوم من الايام كنا صحاب جدا و برغم ان اللي هقولهولك يمكن يضايقك مني بس الصداقه ..

قاطعته انت بنرفزه ... " لخص يا حسين .. في ايه "





واقف في بيت خطيبتك اللي كلها كام يوم و تبقي زوجتك ... بتحاول تكون هادي و حاطط احتمال اخير ان حسين يكون كداب

دخلت هي فرحانه بيك و لسه هتسألك ايه اللي جابك بدري كده علي غير ميعاد

سالتها بشكل مباشر ... " ليه مقلتليش انك كنتي مرتبطه ايام الكليه "

بلمت هي شويه و بعدين لقيت ملوش معني انها تسالك عرفت منين ...

كملت انت بعد ما اتاكدت ان اللي عرفته صحيح .. " كنتي مرتبطه بزميل ليكي من تاني سنه في الدراسه و لحد قبل التخرج .. قصه حبكم كانت قويه لدرجه الدفعه كلها عارفاها "


اخير ابتدت تنطق " مصطفي .. الموضوع كان حب مراهقه ... و مكنش زي ما انت متخيل ... و ماما كانت عارفه بالموضوع ... انا معملتش حاجه غلط ... دفعتنا صغيره عشان كده طبيعي الحاجات دي تتعرف علي مستوي الدفعه مش علشان هي كانت قصه زي اللي في دماغك"

" و ليه مقولتليش ..." دي منك طبعا

" لان الموضوع انتهي و نسيته خلاص يا مصطفي ... صدقني يا مصطفي كل حاجه كانت في النور و ماما كانت عارفه من اول يوم"

سكت انت خالص و ابتدي عقلك يوقع في الحيره


" اصدقها ... كلنا حبينا قبل كده .. و بعدين بتقول مامتها كانت عارفه "
" و لو كانت القصه زي ما هي بتقول ليه خافت تقولك .. و تصدق منين ان مامتها كانت عارفه .. مهي ممكن تكون بتكدب عليك ... و طبعا امها مش هتبوز الجوازه علي حاجه زي دي حتي عشان خاطر سمعة بتها "

" لا بس حتي لو مكانتش مامتها عارفه ... انا واتق في رشا .. ما احنا جيران من زمان و مخطوبين بقالنا سنتين .. لو مكنتش بنت كويسه كنت حسيت "
" و ليه متقولش انها بقت كويسه بعد ما انكسر قلبها .. تضمن منين انها مش فاكراه .. و انها بس بتتجوزك كده من باب انه لازم تتجوز

قولي بقي يا بطل .. لو انت مكان مصطفي و عرفة بالموضوع ده صدفه كده قبل الجواز .. هتمم الزواج ولا هترفض .. و ليه هترفض ؟

اما انتي يا بنوتة فلو اكتشفتي ان خطيبك كان عايش قصه حب جميله طول فترة الدراسه .. و برضه اكتشفتي ده صدفه و قبل الجواز ... هتممي الزواج .. ولا هترفضي